President Cyril Ramaphosa het 'n ondersteuningspakket van R500 miljard aangekondig om Suid-Afrikaanse besighede en burgers tydens die COVID-19-pandemie te help.
Ramaphosa het gesê van die finansiering sal verkry word deur die herprioritisering van sowat R130 miljard binne die huidige begroting.
Die res van die fondse sal van beide plaaslike bronne, soos die Werkloosheidsversekeringsfonds, en van globale vennote en internasionale finansiële instellings ingesamel word.
Die Wêreldbank, Internasionale Monetêre Fonds, BRICS Nuwe Ontwikkelingsbank en die Afrika-ontwikkelingsbank is genader, het hy gesê.
Ramaphosa het gesê die regering se ekonomiese reaksie op die koronaviruskrisis kan in drie fases verdeel word.
- Die eerste fase het middel Maart begin toe die koronaviruspandemie as 'n nasionale ramp aangekondig is. Die maatreëls het belastingverligting, die vrystelling van ramphulpfondse, noodverkryging, loonondersteuning deur die WVF en befondsing aan klein besighede ingesluit.
- Die regering begin nou met die tweede fase, wat die ekonomiese ondersteuningspakket van R500 miljard insluit.
- Die derde fase is die ekonomiese strategie wat geïmplementeer sal word om die herstel van die ekonomie te dryf namate die land uit hierdie pandemie kom.
Hoe die geld bestee gaan word
Die President het 'n uiteensetting gegee van hoe die R500 miljard aan Suid-Afrikaanse burgers en besighede beskikbaar gestel sal word.
- R20 miljard sal aangewend word om die pandemie te beveg en besmette mense te ondersteun.
- R20 miljard sal aan munisipaliteite beskikbaar gestel word vir noodwatervoorsiening, verhoogde ontsmetting van openbare vervoer en fasiliteite, en die verskaffing van kos en skuiling aan haweloses.
- R50 miljard sal gaan om die lot te verlig van diegene wat die desperaatste deur die koronavirus geraak word.
- R100 miljard sal opsy gesit word vir die beskerming van werksgeleenthede en om werk te skep.
- R40 miljard is opsy gesit vir inkomstesteunbetalings vir werkers wie se werkgewers nie hul lone kan betaal nie.
- R2 miljard sal beskikbaar gestel word om KMO's en spaza-winkeleienaars en ander klein besighede by te staan.
- ’n Leningswaarborgskema van R200 miljard sal in vennootskap met die groot banke, die Nasionale Tesourie en die Suid-Afrikaanse Reserwebank van stapel gestuur word.
- R70 miljard se belastingmaatreëls om kontantvloeiverligting of direkte betalings aan besighede en individue te bring.
Die R50 miljard om die mense wat die meeste deur die koronavirus geraak word te help, sal soos volg uitgedeel word:
- Kinderondersteuningstoelaagbegunstigdes sal 'n ekstra R300 in Mei ontvang en van Junie tot Oktober sal hulle 'n bykomende R500 elke maand ontvang.
- Alle ander begunstigdes sal vir die volgende ses maande 'n ekstra R250 per maand kry.
- ’n Spesiale Covid-19 Maatskaplike Verligting van Nood-toelae van R350 per maand vir die volgende 6 maande sal betaal word aan individue wat tans werkloos is en geen ander vorm van maatskaplike toelae of WVF-betaling ontvang nie.
Ramaphosa het bygevoeg dat hulle 'n risiko-aangepaste benadering tot die terugkeer van ekonomiese aktiwiteit sal volg.
Dit sal gedoen word deur die volgehoue behoefte om die verspreiding van die koronavirus te beperk te balanseer met die behoefte om mense terug te kry werk toe.