Die Nasionale Vergadering sal weer 'n ad hoc-komitee instel om Artikel 25 van die Grondwet te wysig om onteiening sonder vergoeding toe te laat.
Twee weke gelede het alle partye by die Nasionale Vergadering se programmering ingestem om die ad hoc-komitee wat Artikel 25 wysig, te laat verval.
Die komitee het 'n sperdatum gehad om sy werk teen die einde van Mei te voltooi.
Dit was te midde van 'n uitgebreide openbare deelnameproses toe die koronavirus Suid-Afrika bereik het en maatskaplike distansieringsmaatreëls ingestel is om die verspreiding daarvan te voorkom.
Die komitee kon dus nie voortgaan met openbare vergaderings nie, wat gewoonlik groepe van meer as 50 mense gelok het.
Op verlede week se vergadering van die programmeringskomitee het opposisie-LP’s gesê hulle was verbaas toe die ANC voorgestel het om die komitee te herstig op die vorige dag se vergadering van die Hoofsweepsforum.
LEES | Wysiging van Artikel 25 van die Grondwet: Vyf vrae beantwoord
Die ANC het voorgestel dat die komitee die sperdatum van einde Oktober kry om sy werk af te handel.
Die VF Plus en DA – wat ’n wysiging teenstaan – het gesê die komitee moet nog nie gestig word nie gegewe die onsekerheid rondom die Covid-19-pandemie.
Die ANC, gerugsteun deur die EFF – wat albei 'n wysiging wil hê, al is dit in verskillende vorme – het gesê die komitee se spertyd kan altyd verleng word.
Thandi Modise, speaker van die Nasionale Vergadering, het gesê sy sal die saak met haar adjunk Lechesa Tsenoli bespreek.
Hervestig
Op Donderdag se vergadering van die Nasionale Vergadering se programmeringskomitee het Tsenoli gesê die komitee sal gestig word, maar sy sperdatum sal later bepaal word, maar hulle siening is dat dit sy werk teen die einde van die jaar moet voltooi.
Hy het gesê die komitee sal innoverende maniere moet ondersoek om sy openbare deelname uit te voer.
Natasha Mazzone, DA-hoofsweep, het gevra dat die besluit om die komitee te herstig op skrif aan partye gestel word.
Aangesien die komitee verval het, sal dit deur 'n mosie van die Nasionale Vergadering heringestel moet word.
In Julie verlede jaar het die Nasionale Vergadering besluit om die komitee aan te stel en dit die taak te gee om Artikel 25 van die Grondwet te wysig. Dit nadat die Vyfde Parlement se komitee met dieselfde taak nie sy werk kon voltooi voordat die Parlement vir die 2019-verkiesing opgestaan het nie.
Die komitee se aanvanklike sperdatum was 31 Maart.
Die Nasionale Vergadering het dit tot 29 Mei in Maart verleng.
Artikel deur News24
